༄༅། །ཚད་ལྡན་གྱི་ལས་དང་ཚད་ལྡན་གྱི་བསྙེན་བཀུར།

ཆོས་ཀྱི་སྡེ་ཆེན་རིས་མེད་དགེ་འདུན་སྡེ།།
རྣམ་དག་ཆོས་ཀྱི་ཐབས་ལམ་སྟོན་མཛད་པའི།།
རྒྱལ་སྲས་བླ་སྤྲུལ་དགེ་བའི་བཤེས་རྣམས།།
བདག་གི་སྒོ་གསུམ་གུས་པའི་སྙིང་ནས་འདུད།།

ཕྱི་ཚུལ་དུལ་བའི་སྤྱོད་ལམ་དོན་དང་ལྡན།།
ནང་སེམས་དུལ་བའི་ཉམས་ལེན་རང་རྒྱུད་ཕྱུག །
ཕྱི་གཙང་ནང་གཙང་རྟུལ་ཞུགས་ལ་གནས་པའི།།
ངེས་དོན་དགེ་བའི་བཤེས་རྣམས་རྟག་ཏུ་འདུད།།

བསླབ་པ་གསུམ་གྱི་ལམ་ལ་ཉམས་ལེན་གྱི།།
སྡེ་སྣོད་གསུམ་གྱི་གཞུང་ལ་འཆད་ཉན་དང་།།
བཤད་སྒྲུབ་འཁོར་ལོ་གསུམ་གྱི་བྱ་བ་ལ།།
བརྩོན་པའི་དགེ་འདུན་རྣམས་ལའང་སྙིང་ནས་འདུད།།

ཆོས་པའི་གཟུགས་བརྙན་ཆོས་ཚོང་བྱེད་འདོད་ཀྱིས།།
ཆོས་གོས་སེར་པོ་གྱོན་ནས་ཆོས་མིང་ཁྱེར།།
ཆོས་ཀྱི་གསུང་རབ་ཚོང་རྫས་འདུ་ཤེས་ཀྱིས།།
ཆོས་ཀྱི་ཁྱབ་སྤེལ་བྱེད་ལ་ངས་མི་གུས།།

ཆོས་ཀྱི་ཚིག་བཅད་རེ་ལ་སྒྲོ་ལོ་རེ།།
དབང་བསྐུར་རྗེས་གནང་རེ་ལ་སྒྲོ་ལོ་རེ།།
མོ་ལུང་རྩིས་པ་རེ་ལ་སྒྲོ་ལོ་རེ།།
ཆོས་ཀྱི་ཚོང་དཔོན་རྣམས་ལ་ངས་མི་གུས།།

མིང་ལ་ཆོས་ཚོགས་དོན་ལ་ཁྲོམ་ར་ཉིད།།
ཕྱི་ཡི་ཆོས་གཟུགས་ནང་ན་བསམ་རྒྱུ་དངུལ།།
ཁ་ཞེ་མི་མཐུན་གཏིང་ནག་གཡོ་སྒྱུ་ཅན།།
འཇིགརྟེན་བླུན་རྒན་རྣམས་ལ་ངས་མི་གུས།།

དམ་ཆོས་འཚོང་རིན་ཐོབ་པའི་སྒྲོ་ལོ་དངུལ།།
ལོག་འཚོ་དུག་དང་འདྲེས་པའི་ཟས་གོས་སོགས།།
དགེ་འདུན་སྡེ་ལ་དྲངས་པ་མ་འོས་པས།།
ཚད་ལྡན་བསྙེན་བཀུར་ངོར་རེ་ཤེས་པར་གྱིས།།

སེར་བྱེས་ལྡན་མ་དགེ་བཤེས་བསོད་ནམས་འགྱུར་མེད་ནས། ༢༠༠༧ ཕྱི་ཟླ ༨ཚེས༢༥ཉིན་བྲིས།། །།