༄༅། །ཞི་བདེ་དང་རང་དབང་ལ་དགའ་བའི་མཁྱེན་དཔྱོད་མཆོག་ཏུ་ཡངས་པའི་འཛམ་གླིང་གྱི་དབུ་ཁྲིད་རྣམས་ཀྱི་གཙོས་མི་མང་ཡོངས་ཀྱི་སྙན་ལམ་དུ་ཞུ་རྒྱུར། དེང་སྐབས་ཕྱོགས་མཚམས་ཀུན་ཏུ་སྐྱེ་བོ་ཕལ་མོ་ཆེར་འཇིག་ལྟས་ང་རྒྱལ་ཞིང་ལྟ་ངན་གཅོང་རོང་དུ་ལྷུང་ཞིང་། འདོད་ཡོན་གྱིས་མྱོས་པ་སོགས་ནང་གི་ཉོན་མོངས་རག་པ་འཕེལ་ཞིང་། འགྲན་སེམས་དང་ཕྲག་དོག་བཅས་ཀྱི་འཛམ་གླིང་ཧྲིལ་བོ་ཁ་ལོར་བསྒྱུར་བཞིན་པའི་གནས་སྐབས་འདིར། འཇིག་རྟེན་སྤྱིའི་བདེ་སྡུག་ལ་འགན་འཁྲི་ཡོད་པའི་མཁས་དབང་མང་པོ་ཞིག་གིས་དུས་རབས་ཀྱི་དཀྱོགས་མཚམས་སུ་འཛམ་གླིང་ས་ཆེན་འདིར་མཛེས་ཤིང་ཡིད་དུ་འོང་བའི་ཞི་བདེའི་འཁོར་ཡུག་གཅིག་ཏུ་བསྐྲུན་རྒྱུར་འབད་བརྩོན་བྱས་དང་བྱེད་བཞིན་པའི་ནང་། མཁས་དབང་མང་པོས་ཐུན་མོང་ལ་བདེན་པའི་ལམ་ནས་ཡིད་ཆེས་དང་ངེས་ཤེས་རྙེད་པ་ནི། བདག་ཅག་གི་སྟོན་པ་བཅོམ་ལྡན་འདས་ཀྱིས་གསུངས་པའི་ཞི་བསིལ་ཆོས་ཀྱི་ཐབས་ལམ་འདི་ཉིད་མ་བརྒྱུད་པར་གཏན་གྱི་བདེ་བ་ཞིག་ཡོང་ཐབས་མེད་པ་དེ་ཡིན།རྒྱུ་མཚན་དེ་ལ་བརྟེན་ནས་བློ་གྲོས་གཟུར་བོར་གནས་ཤིང་མཁས་མཛངས་ལྡན་པའི་འཛམ་གླིང་གི་དབུ་ཁྲིད་ཚོས་སྟོན་པའི་གདུང་ཚབ ༧ གོང་ས ༧ སྐྱབས་མགོན་ཆེན་པོ་མཆོག་ལ་འཛམ་གླིང་ཞི་བདེའི་དེད་དཔོན་གྱི་མཚན་བསྟོད་སྲིད་གསུམ་གྱི་འཛིན་མའི་ཁྱོན་དུ་བསྒྲགས་པའང་དོན་དང་ལྡན་པར་སེམས་སོ།
གོ་ལའི་འཁོར་འགྲོས་དང་དུས་ཀྱི་རྟགས་མཚན་བཅས་ལ་ལྟར་སྣང་གི་ཡར་རྒྱས་ཇི་ལྟར་ཕྱིན་ཀྱང་། འཇིག་རྟེན་འདིའི་ཐོག་ཏུ་ཕྱིའི་དངོས་པོ་དང་ནང་གི་བསམ་བློ་གཉིས་ཀར་མི་འདོད་པའི་རྐྱེན་ངན་སྣ་ཚོགས་ཡོང་དང་ཡོང་བཞིན་ཁ་འདིའང་མཐར་གཏུགས་ན་ཆགས་སྡང་གཉིས་ཀྱིས་གཞན་དབང་དུ་ཤོར་བར་དཔོག་ཐུབ། གང་ཞིག་ཞི་བསིལ་གཏན་གྱི་བདེ་བ་ལྷུར་ལེན་པའི་སྐྱེ་བོ་དག་གིས་ཆགས་སྡང་གཉིས་ཀྱི་ངོ་བོ་དང་། ལྷག་པར་དུ་འཚེ་བ་མེད་པ་ཞེས་པའི་ཚིག་འབྲུ་གཉིས་ཀྱི་དོན་དག་གོ་བ་དཔྱིས་ཕྱིན་པ་ཤེས་དགོས་པ་མ་ཟད། ཁ་བཤད་ལག་ལེན་ཐོག་ཏུ་ངེས་པར་དུ་འགེལ་དགོས།དེ་ཡང་བྱམས་པ་དང་སྙིང་རྗེ་རྩ་བ་ཅན་གྱི་གཞན་ཕན་ཁུར་དུ་འཁྱེར་བའི་བྱང་ཆུབ་ཀྱི་སེམས་ལ་བརྟེན་ནས་ཕན་ཚུན་མི་མཐུན་པའི་ཕྱོགས་ཐམས་ཅད་ཆོས་ཕྱོགས་ནས་ཞི་བ་བྱེད་དགོས། ཐབས་ལམ་དེ་ལ་མ་བརྟེན་པར་ཞི་སྒོ་གཉིས་པ་ཞིག་བཙལ་ན། ངལ་བ་དོན་མེད་པ་མ་ཟད། རྙེད་རྒྱུ་ཡང་ནམ་མཁའི་མེ་ཏོག་དང་མཚུངས་སོ།
འཚེ་མེད་ཞི་བའི་ལམ་གྱི་དགྲ་བོ་ནི། འཛམ་གླིང་ནང་དུ་དམག་དོན་གྱི་བྱ་བ་རྣམས་ཡིན་ལ། འཛམ་གླིང་འདིའི་སྒང་དུ་དམག་དོན་གྱི་བྱ་བ་ཇི་སྲིད་ནམ་གནས་བར་དུ་དེ་སྲིད་དུ་འཛམ་གླིང་ཞི་བདེ་ཡོང་ཐབས་མེད་ལ། མཁས་དབང་རྣམས་ཀྱི་འཛམ་གླིང་ནང་དུ་དམག་དོན་གྱི་བྱ་བ་དང་རྡུལ་མཚོན་ཆ་རིགས་ཉུང་འཁྲི་གཏོང་རྒྱུ་དང་མེད་པར་བཟོ་རྒྱུ་ནི་དུས་རབས་གསར་པ་འདིའི་ནང་དུ་ཕྲག་ཏུ་བབས་པའི་ལས་འགན་ཆེ་ཤོས་ཞིག་ཏུ་མངོན། ཕྲན་ལ་དམག་དོན་གྱི་བྱ་བ་རྣམས་མེད་པར་བཟོ་ཐུབ་པའི་ནུས་མེད་ཀྱང་། རང་བཞིན་གྱིས་མེད་པར་ཆགས་ན་སྙིང་གི་དཀྱིལ་ནས་དགའ་ཞེན་དང་ཡི་རང་གནས་སུ་མཆིས།
རྒྱལ་ཁབ་ཕན་ཚུན་བར་གྱི་མི་མཐུན་པའི་ཆེ་ཤོས་ཡང་། རྒྱལ་ཁབ་དེ་དང་དེའི་ནང་དུ་དམག་མི་འབོར་ཆེན་ཡར་རྒྱས་གཏོང་རྒྱུ་དང་། དེ་བཞིན་དུ་རྡུལ་ཕྲན་མཚོན་ཆ་ལ་སོགས་པའི་ཧ་ཅང་གི་ཉེན་ཁ་ཆེ་བའི་གོ་མཚོན་འདྲ་མིན་སྣ་ཚོགས་ཡར་རྒྱས་གཏོང་བའི་རྐྱེན་གྱིས་རྒྱལ་ཁབ་གཅིག་འོག་གཅིག་ཏུ་ཚུད་པའི་ཉེན་ཁ་མཐོང་ནས་ཕན་ཚུན་ཕྲག་དོག་དང་། འགྲན་སེམས། ཆགས་སྡང་བཅས་ཀྱི་ཉོན་མོངས་རགས་པའི་གཞན་དབང་དུ་གྱུར་ཚེ། མི་གསོད་ཕྲག་སྦྱོར་གྱི་བྱ་བ་སྣ་ཚོགས་དེ་འདྲ་ཡོང་བཞིན་པ་ནི་མིག་མཐོང་ལག་ཟིནཡིན། འཛམ་གླིང་རྒྱལ་ཁབ་སོ་སོའི་ནང་དུ་དམག་དོན་གྱི་བྱ་བ་མེད་པ་དང་། རྡུལ་ཕྲན་མཚོན་ཆའི་རིགས་གང་ཡིན་མེད་ན། རྒྱལ་ཁབཕན་ཚུན་བར་འབུ་ཆེ་ཆུང་ཟ་འོང་བསམ་པའི་ཉེན་ཁ་ལས་ཡོངས་སུ་གྲོལ་བ་མ་ཟད། དུས་དེ་ནས་བཟུང་འཛམ་གླིང་སྐྱེ་འགྲོ་ཡོངས་ལ་ཞི་བདེའི་ཚོར་བ་གནས་ཐུབ་པ་བརྒྱ་ཆ་བརྒྱ་ཐམ་པ་ཐག་གཅོད་ཆོག་པ་བཅས་བདག་གིས་མགྲིན་པ་གསང་ནས་སྤོབས་པ་དང་བཅས་སྨྲས་སོ།། །།
སེར་བྱེས་ལྡན་མ་དགེ་བཤེས་བསོད་ནམས་འགྱུར་མེད་ནས། ༢༠༠༨ ཚེས ༢༥ ཉིན་བྲིས།།
